BE-foto-coaching

5 kontseilu zure talderako coach bat kontratatzeko garaian

Interesgarria

5 urria, 2020 | argitaratuta LABORAL Kutxa

Zer da taldeko coachinga?

Enpresa askok une zailak bizi izaten dituzte beren ibilbidean, eta aparteko motibazio-ekarpenak behar izaten dituzte suspertzeko.

Aldi horietako batzuetan, plantillak nolabaiteko akidura pairatzen du arrazoi batengatik edo besteagatik, eta kanpoko laguntza behar izaten du sormena areagotzeko, anbizioa berreskuratzeko eta, azken batean, lana dinamismo handiagoarekin egiteko.

Motibazio-plus hori lortzeko, enpresek gero eta neurri handiagoan jotzen dute coach-aren figurara. Haren lana plantilla batean gogo-aldarte jakin bat eragiten duten arrazoiak behatzean, bilatzean eta identifikatzean datza, langileei egoera hori gainditzen eta produktibitatea hobetzen laguntzeko.

Zer eskaintzen du enpresen coachingak?

Enpresen coachingaren helburua ez da erantzun edo soluzio zehatzak eskaintzea, pertsonei egin beharreko bidea erakustea baizik. Horretarako:

  • Helburu indibidualak edo profesionalak ezartzen laguntzen die.
  • Haien itxaropenetan oinarritutako ikuspegi garbi bat ematen du.
  • Pertsona gisa hobetzera animatzen ditu.
  • Ikaskuntza eta prestakuntza sustatzen ditu.
  • Trebetasun berriak aurkitzen laguntzen die.

Baina zer irizpiderekin aukeratzen du enpresa batek bere plantillaren motibazioa eta errendimendua hobetzen lagundu behar dion pertsona? Enpresei zuzendutako coaching motibazionaleko zerbitzu bat kontratatu aurretik, kontuan hartu behar dituzu ondoren azalduko ditugun elementuak.

Nola aurki dezaket coach egokia?

  • Identifikatu hobetu nahi duzun egoera, eta aztertu egokia den coachingerako. Zure enpresak behar duena plantillari zer hobetu behar duen edo gauzak nola egin behar dituen azalduko dion norbait bada, ez du coach bat behar, aholkularitza-zerbitzu edo mentoring-zerbitzu bat baizik. Coachingak beren gaitasun propioak hobetzen eta helburuak zehazten (bete ahal izan daitezen) laguntzen die pertsonei, baina pertsonek berek zehaztu behar dute bide hori.
  • Berrikusi haren lana eta egiaztatu haren kredentzialak. Coach batek ez du Psikologiako lizentziaduna izan behar, ezta enpresa-sektore jakin bateko aditua ere: coachingean baino ez du espezializatuta egon behar. Horretarako, pertsonen portaera eta enpresa-erakundeen funtzionamendua ulertzeko berariazko prestakuntza jaso behar du. Horregatik, garrantzitsua da egiaztatzea kontratatu behar duzun coacha Estatuko edo nazioarteko coaching-elkarteren batek profesionalki egiaztatu duela, hala nola Espainiako Coaching Elkarteak.
  • Ez fidatu soluzio magiko eta bizkorrez. Coach baten zeregina ez da berehalakoa: denbora behar du egoerak aztertzeko eta jarrera berriak inplementatzeko. Horregatik, ezin dira emaitzak espero aste gutxi batzuetan. Kontuan izan hilabeteak edota urteak enkistatuta daraman egoera bat zuzentzeko ez direla nahikoak egun gutxi batzuk. Beraz, ez fidatu edozein gatazka denbora gutxian konpontzen duten metodo edo teknika miragarriak eskaintzen dizkizutenez.
  • Aukeratu ziurtasuna eta konfiantza transmitituko dizkizun pertsona bat. Coach batek bere lanaren onurez eta eraginkortasunaz konbentzitu ezin bazaitu, nekez lortuko du zure plantilla osatzen dutenekin. Coacharen lana eraginkorra izan dadin, erakundea osatzen duten pertsonen parte-hartze aktiboa behar da. Zure kasuan, erabili nahi duen metodologia zure enpresaren premietara egokitzen dela egiaztatu behar duzu, eta gustura sentitu behar duzu lan egiteko erabili nahi dituen tresnekin.
  • Eskatu bermeak. Merkatuan dauden produktu eta zerbitzu gehienekin bezala, coach on batek berme jakin batzuk eskaini behar ditu lanean hasi aurretik. Horregatik, komeni da elkarrekin lortu nahi dituzuen helburuak eta emaitzak idatziz adostea, baita coachak lehen emaitzak lortzeko aurreikusten dituen denborak finkatzea ahalbidetuko duen timing bat ezartzea ere. Era horretan, entrenamendua amaitzeko behar izango dituen saioen kopuruaren inguruko erreferentzia bat izango du coachak.

Aholku hauek lagungarriak izango zaizkizu zure plantilla osatzen duten pertsonen motibazioa hobetzeko eta, era horretan, zure enpresaren lehiakortasuna handiagotzeko.

Tu opinion:

Zure e-posta helbidea ez da argitaratuko. Beharrezko eremuak * markatuta daude

*
*